motive lartësie

Dy këmbë të stërmëdha

me çizme të tmerrshme gjithë gozhdë,

që nxjerrin vetëtima si "s" satanike;

lart qillota të fryra ushtarake

si kofshë bretkose...

kërrusur vij rrotull

sikur mbaj një gur mbi shpinë

shoh

vetëm këmbë, vetëm këmbë

shtypëse rrafshuese.

Këmbë dhe aty ku duhej të fillonte barku i butë,

stomaku ku duhej të fillonte, mushkëritë

zemra

madje, këmbë dhe atje ku duhej t'ishte

koka,

dy këmbë të stërmëdha, gozhdë dhe qillota.

Te vitrinat e mugëta

Xhokondën shoh me një goxha penis ndër duar

më tej një bjonde nudo

me flokë të kreshpëruar

si perturberanca diellore,

pyll plastik penisësh monumentalë,

organe plastike femërore futur në kuti,

përpara me celofanë

diçka si ambalazhi i kukullave,

koka,

gozhdë dhe qillota, këmbë të stërmëdha.