Haiku

1.

Piruete e lulediellit,

Homazh

Për Van Gogun!

2.

Sa rrëqethës

Vaji i vetmuar

I zogut në pyll.

3.

E krisi qiellin

Hiperbola

E vetëtimës…

4.

Dielli pas resh,

Buzëqeshje

Leonardiane...

5.

Pemët pasqyrohen n’ujë;

Zogjtë dhe peshqit

Lozin së bashku...

6.

Lot të stilizuar

Fijet e shelgut,

Që shkrehen e derdhen.

7.

Mollë me kokrra t’arta;

Ndër degë

I këndon bilbili...

                        

8.

Çfarë sensualiteti!

Çelin lulet, këndojnë zogjtë

Shqyhet gazit dielli...

9.

Kur mjellma këndon,

Liqeni

Bëhet lot!

10.

Dordolecët n’ara,

Aktorë të trishtë

Tragjikomedish.

11.

Qull pylli nga shiu;

Kërpudhat dolën,

Por s’bënë pranverë…

12.

Dielli djeg si flakë;

Nga pemët

Bien fosile gjinkallash…

13.

Çeli pranvera!

Sa e bukur jeta,

Sa i vërtetë amshimi...

14.

Zogu fle në fole,

Te lulja flutura;

Ah, të më pranonin mua!

15.

Si u thur

Ylberi

N’avlëmendin e shiut!

16.

Diellin që u zhyt në det,

Rrekem ta kap

Si Peshkun e Artë!

17.

I kuqi i buzëve

Te tehu i gotës;

Si ike e s’u puthëm?

18.

I mallëngjyer

Dielli

Në perëndim!

19.

Zogj ekzotikë

Ylberet që ngrihen

Mbi ujëvarat…

20.

Krahu i fluturës

Tavaloca n’erë

E piktorit…

21.

Mjellmën mes ujërash

Rri dhe shoh

Si t’ish femër nudo.

22.

Ato plepat, po atje

Presin e presin

Ndanë udhëve…

23.

Lepuri n’agim

Mes shkurresh shijon

Luleshtrydhen e diellit…

24.

Gjarpri u zhvesh;

Lëkura e ftohtë

Dhuratë mistike për mozaikun.

25.

Sa shumë polen

Shkundi sonte

Gonxhja e hënës!

26.

Miq, vetëm fëmijët

Ndrisin sa dielli,

Kur qeshin...

27.

Bie një gjethe,

Bie një pupël;

Pema dhe zogu pikëllohen!

28.

Shend e verë

Bajamja

E çelur!

29.

Gjelit të egër ngjyrat

Ia mbuloi bora;

Pula iu largua…

30.

Ajo po më çmend, ajo

Reja që bëhet engjëll

E më pas djall…

31.

Kjo fole përtokë

Më shqetëson

Si shtëpia e shembur…

32.

Zot, mbeta këtu,

Në provincën

Tokë!

33.

Zabelin flu era

Shih, kur ta shprishë

Si push lulesh…

34.

Pas pyllit dielli

I kuq dhe i madh

Si zjarr…

35.

Ujëvara e ngrirë

Ëndërr vere

E ndërprerë…

36.

U rebelua lulja;

Flutur u bë

Dhe, fluturoi...

37.

Yjësi e zbritur

Hurmat ndër degë

N’oborrin me mjegull.

38.

U vjeshtëzua pylli...

Si ta përballoj

Herbariumin mallëngjyes?

39.

Lulja që shtriu shiu,

Si femra pas dashurisë

M’e bukur u çua...

40.

Sa herët shtroi bora!

Si të shkel fushës;

Nën praskun që zbardh ka lule…

41.

Tundeni tundeni plepin!

S’e shihni sa keq ka ngecur

Hëna ndër degë?

42.

Hëna mbi mal

Shih, kur të shkasë

Si ortek i bardhë!

43.

Ndrikullat bletë

Nguten të lidhin

Lulemollën me luleftoin...

                                            

44.

Ah, asonanca

E rrjedhës së lumit

Me psherëtimën e pyllit!

45.

Fluturoi

Orkestra

E zogjve…

46.

Bien gjethet,

Rrokjet

E vjeshtës…

47.

Shelgu,

Sensualisht lëshuar

Si haiku japonez ...

48.

Një janë, një

Valët e lumit,

Telat e violinës...

49.

Pulëbardha cik ujin

Cik cik cik;

Liqeni zgjohet...

50.

Shiu mbi zabel

Psherëtimë

E fshehtë...

51.

Kur ra tablo e vjeshtës

E dimrit, kur u var?

Nxin pylli, kodra zbardh...

                                              

52.

Miniatura dielli

Rruzujt e vesës,

Që shndrisin fushën.

53.

Ikën shirat;

Ylberi mbeti pas,

Dhuratë e frikshme si Kali i Trojës.

54.

Yjet mbi valë

Ma djegin trupin

Si kandila deti.

55.

Lulja mbi pleh

Predikim pavdekësie

Nga vetë vdekja.

56.

Këtë dimër

Foletë e zogjve

Pubisin e asaj më kujtuan...

                                                                                 1995
konarel